6 ҳазор қоидавайронкунӣ дар ду рӯз ошкор шудааст

Душанбе 24.08.2015, (АМИТ «Ховар»).- Рӯзҳои истироҳатии гузашта кормандони Раёсати бозрасии давлатии автомобилии ВКД Ҷумҳурии Тоҷикистон дар роҳҳои мошингарди мамлакат барои пешгирӣ кардани садамаҳо ва дигар ҳодисаҳои нохуши автомобилӣ маҷмӯи чорабиниҳоро амалӣ карданд. Дар натиҷаи гузаронидани чорабиниҳои мазкур дар давоми ду рӯз дар қаламрави кишвар 6 ҳазору 903 ҳолати вайронкунии қоидаи ҳаракати роҳ ошкор ва ба қайд гирифта шуд.
Аз ҷумла, 44 ҳодисаи рондани мошин дар ҳолати мастӣ, 263 ҳодисаи рондани мошин бе ҳуҷҷати ронандагӣ, 51 ҳодисаи итоат накардан ба кормандони милитсия, 25 ҳодисаи рондани мошин бе аломати қайди давлатӣ, 192 ҳодисаи аз меъёр зиёд истифода шудани мошинҳо дар қатораи туй, ошкор ва ба қайд гирифта шудааст.
Тавре ки аз ВКД ба АМИТ «Ховар» иттилоъ доданд, рӯзи 22-юми август  3 ҳазору 563 қонунвайронкунӣ ва рӯзи 23-юми август  3 ҳазору 340 қонунвайронкунӣ аз тарафи ронандагони васоити нақлиёт содир шудааст.