Спартакиада барои дарёфти Ҷоми вазири мудофиа

Душанбе, 10.08.2015. (АМИТ «Ховар», Лайло Тоирӣ).-Бахшида ба 22-солагии таъсисёбиии Қувваҳои ҳарбӣ-ҳавоии Вазорати мудофиаи Ҷумҳурии Тоҷикистон ва барои таҳким бахшидани дӯстию рафоқат миёни хизматчиёни ҳарбӣ аз 4-ум то 12-уми августи соли 2015 спартакиада барои дарёфти Ҷоми вазири мудофиа доир гашта истодааст.
Спартакидаи мазкур дар пойгоҳи қисми ҳарбии 07033-и Қувваҳои ҳарбӣ-ҳавоӣ ва мудофиаи зиддиҳавоӣ дар байни афсарону сарбозони Дастгоҳи марказии Вазорати мудофиа, Ситоди генералии Қувваҳои Мусаллаҳ, навъҳои қӯшун, Донишкадаи ҳарбӣ, сохторҳои қудратии мамлакат, Пойгоҳи ҳарбии 201-уми Федератсияи Русия ва Контингенти ҳарбии Ҷумҳурии Ҳиндустон дар Тоҷикистон ҷараён дорад.
Иштирокчиёни мусобиқа аз рӯи намудҳои гуногуни варзиш дар байни  ҳам қувваозмоӣ намуда, ҳар яке дар навбати худ кӯшиш менамояд, ки ба пирӯзӣ ноил гарданд. Афсарон ва сарбозон аз рӯйи намудҳои варзишии валейбол, футбол ва тенисси рӯи миз, ва гуштини миллӣ байни ҳамдигар сабқат намуда истодаанд.
Тавре ки аз Вазорати мудофиаи ҷумҳурӣ хабар доданд, дар назар аст, ки ғолибон ва дастаҳое, ки ҷойҳои намоёнро ишғол менамоянд, аз тарафи Клуби марказии варзишии артиш бо медалу ифтихорномаҳои хотиравӣ сарфароз гарданд.