Истиқлолият — дастоварди бузург ва неъмати беҳамтои таърих

Душанбе, 08.09.2015. (АМИТ «Ховар»).- Ба истиқболи солгарди  24-умини Истиқлолияти давлатии Ҷумҳурии Тоҷикистон дирӯз дар  Донишгоҳи  давлатии  Хуҷанд ба номи академик Бобоҷон Ғафуров таҳти унвони «Истиқлолият — дастоварди бузург ва неъмати беҳамтои таърих» конфронси илмию амалӣ барпо гардид. 
Ректори донишгоҳ  Анвар  Мақсудов дар суҳбати худ,  аз ҷумла изҳор дошт, ки  Ҳукумати Тоҷикистон таҳти  роҳбарии Президенти мамлакат Эмомалӣ Раҳмон инкишофи илмро дар баробари маориф ва фарҳанг самти афзалиятноки стратегияи рушди миллӣ меҳисобад ва барои таъмини  самаранокии корҳои илмиву таҳқиқотӣ ҳама чораҳои заруриро амалӣ мегардонад. 
Тарбияи насли соҳибмаърифат, огоҳу бедордил, забондону ҷӯянда ва донандаи техникаву технологияи муосир бояд ҳадафи асосӣ ва муҳими фаъолияти ҳар як омӯзгор бошад. Зеро пешрафту тараққиёти давлатро маҳз мутахассисони баландихтисосу кордон таъмин мекунанд.
Инчунин дар конфронс дар мавзӯъҳои «Истиқлолият — омили  ҳастии  миллат  ва  бақои  давлат», «Маориф — самти афзалиятноки  сиёсати  Президенти  мамлакат» маърӯзаҳо шунида шуданд.