«Ҷумҳурият» ба донишҷӯёни фаъоли эҷодкор идрорпулӣ ваъда медиҳад

Душанбе, 08.09.2015.(АМИТ «Ховар»).-Дар остонаи таҷлили 24-умин солгарди Истиқлолияти давлатии  Ҷумҳурии Тоҷикистон бо ташаббуси садорат ва кафедраи журналистикаи байналхалқии факултети журналистикаи ДМТ вохӯрии донишҷўёну устодони факултет бо ҳайати кормандони рӯзномаи  «Ҷумҳурият» доир гардид. Зимни мулоқот аз ҷумла зикр гардид, ки рӯзномаи «Ҷумҳурият» дар таҳкими сулҳу ваҳдати тоҷикон ва ҳифзи истиқлолияти давлатӣ нақши  устувори  худро тули даҳсолаҳо  гузоштааст  ва ин раванд дар ҷараён аст. 
Қурбоналӣ Раҳмонзода, сармуҳарири нашрияи «Ҷумҳурият»  дар роҳи амалӣ гаштани сиёсати пешгирифтаи Ҳукумати кишвар донишҷӯёнро барои ҳамкории судманд ва созанда даъват намуда, аз ҷумла ваъда дод, ки дар сурати пайдо шудани имкониятҳо нашрия  стипендияи махсуси худро барои донишҷўёни фаъоли эҷодкор таъсис хоҳад дод. Зимни вохӯрӣ мудири кафедраи журналистикаи байналхалқӣ Сангин Гулов «Ҷумҳурият»-ро модари матбуоти тоҷик номид ва ба аҳли эҷоди ин нашрия изҳори сипос намуд, ки дар сўҳбату мулоқотҳои доиршаванда дар факултети журналистка, бо вуҷуди серкорияшон фаъол мебошанд.