Зуҳуров аз минбари СММ доир ба қарор додани демократия дар хидмат ба сулҳ сухан кард

       Душанбе, 02.09.2015.(АМИТ «Ховар», Марзия Саидзода).- «Ҷумҳурии Тоҷикистон эъмори кишвари ҳуқуқбунёд, риояи ҳуқуқ ва озодии инсон, рушди демократияро ҳадафи тақдирсози худ мешуморад.Тавре Президенти Ҷумҳурии Тоҷикистон Эмомалӣ Раҳмон таъкид кардааст, «роҳи мо дар самти демократия ва шакли идоракунии давлат бебозгашт аст». Ин матлабро Шукурҷон Зуҳуров-раиси Маҷлиси намояндагони Маҷлиси Олии Ҷумҳурии Тоҷикистон дар баромадаш аз минбари СММ зимни баргузории  Конфронси чоруми умумиҷаҳонии раисони парлумонҳо дар шаҳри Ню-Йорки Амрико баён дошт. Мавсуф дар конфронс дар мавзӯи «Қарор додани демократия дар хидмат ба сулҳ ва рушди устувор» баромад кард.  Ш. Зуҳуров афзуд, ки соли 2015 соли анҷоми иҷрои Ҳадафҳои рушди ҳазорсола мебошад. Роҳбарон ва сарони Ҳукуматҳо, амалан, ҳамаи ҷаҳон, ки Изҳороти СММ роҳнамои худ меҳисобанд, уҳдадориҳои зиёдеро бар дӯш гирифтанд, ки аз иҷрои онҳо дар бештари мавридҳо тақдири ояндаи хонаи ҳамаи мо — сайёраи Замин вобастагӣ дорад. Зикр шуд, ки дар тӯли даҳсолаҳои охир ба шарофати фаъолиятҳои ҳамоҳангшуда ҷомеаи ҷаҳонӣ дар иҷрои Ҳадафҳои рушди ҳазорсола ба комёбиҳо ноил гардид. «Бовар дорам, маҷмӯи вазифаҳои мушаххас дар доираи Ҳадафҳои рушди устувор, ки барои ҳалли мушкилоти аз байн бурдани камбизоатӣ, дастовардҳои баробарии гендерӣ ва таъмини амнияти озуқаворӣ дар миқёси глобалӣ равона шудаанд, идомаи баэътимоди консепсияи Ҳадафҳои рушди ҳазорсола мебошанд», таъкид кард Ш. Зуҳуров. 
    Раиси палатаи поёнии Парлумони Тоҷикистон иброз дошт, ки дар  асоси иҷрои ҳадаф ва вазифаҳои ба нақша гирифташуда арзишҳо ва принсипи умумиинсонӣ -демократия, сулҳ, баробарӣ ва адолат, таъмини шароити рушди устувор барои ҳама бояд дар мадди аввал гузошта шаванд. 
Ш. Зуҳуров таъкид кард, ки бо мақсади таъмини минбаъдаи самтҳои афзалиятноки рушди устувори давлатӣ, такмили демократия, таъмин ва ҳифзи ҳуқуқ ва озодиҳои инсон, танҳо дар соли гузашта,  Парлумони Тоҷикистон 233 санади меъёрии ҳуқуқӣ- 15 қонун, 97 тағйиру иловаҳо ба қонунҳои амалкунанда қабул намуда, 26 консепсия, барномаҳои стратегӣ, 77 шартномаи байналмилалӣ, созишнома ва протоколҳо, 18 созишномаи қарзӣ ва грантиро тасдиқ кард. Зикр шуд, ки дар Тоҷикистон иҷрои корҳо дар самти принсипҳои рушди устувор ва татбиқи он дар сиёсат ва барномаҳои давлатӣ дар бахшҳои ҳифзи захираҳои табиӣ, истифодаи пурсамари боигариҳои кӯҳӣ, мудирият бар манобеи обӣ ҷараён доранд. Дар мамлакат шумораи аҳолии ба оби тозаи ошомиданӣ эҳтиёҷдошта  коҳиш ёфтааст.
Ҷумҳурии Тоҷикистон ҳамчун кишвари дорои захираҳои фаровони обӣ тайи солҳои тӯлонӣ ба унвони ташаббускори баргузории чорабиниҳои глобалии марбут ба об баромад намуд. Соли равон Амалиёти байналмилалии даҳсолаи «Об барои ҳаёт», солҳои 2005-2015, ки тавассути Ассамблеяи генералии СММ бо ташаббуси ҷониби Тоҷикистон эълон шуда буд, ба поён мерасад. Даҳсолаи мазкур иқдоми хеле муҳим барои пеш бурдани талошҳо дар роҳи   амалӣ намудани уҳдадориҳои байналмилалии бар дӯш гирифта оид ба масоили об то соли 2015 аст.
 Бо дахли масоили марбут ба сулҳу амният дар ҷаҳон зикр шуд, ки сулҳу субот асоси рушди равандҳои демократия ва озодии инсон ба шумор меравад. Бидуни сулҳу субот ва амнияти комил дар бораи озодӣ ва рушд сухан гуфтан мушкил аст. 
«Мо, намояндагони парлумонҳо, ба раванди демократӣ, қонунҳои ҷомеаи шаҳрвандӣ такя карда вазифадорем ислоҳоти демократиро дар кишварҳоямон фаъолона пеш барем, сулҳу адолатро таъмин созем, терроризм ва ифротгароии мазҳабиро решакан намуда, қонунҳои худро тақвият ва самти идоракунии давлатро беҳтар гардонем», такъид кард дар фарҷом Ш. Зуҳуров.