5- уми октябр- Рӯзи забони давлатӣ

Душанбе, 02.10.2015. (АМИТ «Ховар»).-   Рӯзи забон яке аз падидаҳои мубораки даврони истиқлолият буда, мисли дигар суннатҳои бостонии миллии мо ҳар сол 5- уми октябр дар саросари кишварамон мутантан  ҷашн гирифта мешавад ва барои  мардуми Тоҷикистон азизу мӯътабар аст. 
Барои гузаштагони мо ифтихор аз Ватан ва забон ҳамеша ангезандаи эҳсоси олӣ буда, дар ҳама давру замон аз ҷумлаи мафҳумҳои муқаддастарин арзёбӣ гардидаанд. Беҳуда нест, ки Яъқуби Лайс ба шоире, ки ба забони бегона ӯро васф карда буд, гуфт: «Чизе ки ман андар наёбам, чаро бояд гуфт?». Бо ташаббуси ин марди ватанпарвар шеър гуфтан ба забони модарии мо оғоз гардид ва қофиласолори адабиёти классикии тоҷику форс Абӯабдуллои Рӯдакӣ низ аз ин сарзамин бархост.
Забон ҳанӯз дар набардҳои таърих яке аз майдонҳои истиқлолхоҳиву ватанпарастӣ буда, дар қатори диловарони ин майдони озодихоҳӣ гурӯҳи нафарони огоҳ ва дурандеш, хонаводаи Сомониён иродаи матинро бо тадбиру хирад  омезиш дода, давлати неруманд ва мутамаркази миллиро аз андеша ба воқеият табдил доданд.