Дастгир гардидани нашъаҷаллобон

Душанбе, 06.10.2015 (АМИТ «Ховар»).-Чанде пеш зимни гузаронидани чорабиниҳои фаврию ҷустуҷӯӣ кормандони милитсия нафаронеро дастгир карданд, ки даст ба нашъаҷаллобӣ задаанд.
Бино ба иттилои Вазорати корҳои дохилии кишвар, зимни гузаронидани чорабиниҳои фаврию ҷустуҷӯӣ кормандони милитсия ду сокини шаҳри Душанберо, ки яке марди 26 ва дигаре 33-сола мебошанд, бо гумони даст доштан дар гардиши ғайриқонунии маводи мухаддир дастгир кардаанд.  Дар вақти кофтуков аз онҳо 884 грамм маводи нашъадори афюн ва 205 дона ҳаби МДМА, ки вазни умумиашон 44 граммро ташкил медиҳанд. дарёфт ва мусодира шуд. 
Ҳамчунин аз ҷониби кормандони милитсия рӯзи 4-уми октябри соли равон сокини 51-солаи ноҳияи Ҷ.Расулов бо гумони нигоҳ доштани маводи нашъадор дастгир шуд. Дар вақти азназаргузаронии манзили истиқоматии гумонбаршуда 711 грамм маводи нашъадори бангдона дарёфт ва мусодира шуд. 
Гуфта мешавад, зимни чорабиниҳои фаврию ҷустуҷӯӣ муайян шуд, ки марди 51-солаи сокини ноҳияи Ҷ.Расулов дар замини корами наздиҳавлигиаш ба миқдори 17 бех растании нашъадори навъи бангдонаро ғайриқонунӣ парвариш менамудааст. Вазни умумии растаниҳои дарёфтшуда 8 килою  900 граммро ташкил медиҳад. Нисбат ба ҳодисаҳои мазкур парвандаи ҷиноятӣ оғоз гардида, тафтиш давом дорад.