Истифодаи нодурусти сарватҳои табиӣ ҷомеаи ҷаҳониро ба ташвиш овардааст

Душанбе, 20.11.2015. (АМИТ Ховар).-  «Тайи солҳои охир бо назардошти тараққиёти илму техника, рушди истеҳсолот ва ҷамъшавии партовҳо, инчунин дар натиҷаи зиёд шудани аҳолӣ, истифодаи нодурусту бесобиқаи сарватҳои табиӣ барои қонеъ гардонидани эҳтиёҷоти рӯзгор ва мушкилоту муаммоҳои соҳаи ҳифзи муҳити зист таваҷҷуҳи ҷомеаи ҷаҳониро ҷалб намудааст ва Ҷумҳурии Тоҷикистон чун ҷузъи ҷудонопазири ҷомеаи ҷаҳонӣ аз чунин хатарҳои ҷаҳонӣ дар канор буда наметавонад», -иброз дошт Гулрухсор Тиллоева, сардори маркази экологии Кумитаи ҳифзи муҳити зисти кишвар зимни ироаи маърӯзаи худ дар мизи муддавари ин ниҳод.  
Дар мизи мудаввар ҷараёни иҷрои «Барномаи давлатии комплексии рушди тарбия ва маърифати экологии аҳолии Ҷумҳурии Тоҷикистон  дар давраи  то соли 2020» мавриди муҳокима ва баррасӣ қарор гирифт. 
Иштирокдорон зикр намуданд, ки гарчанде ки аз қабули барнома муддати зиёд нагузашта бошад ҳам, кумита як зумра корҳоро роҳандозӣ намуд. Зимни иҷрои барномаи мазкур дар муассисаҳои таҳсилоти ҳамагонӣ ва донишгоҳу донишкадаҳо фанни экология таъсис гардида, мутахассисони соҳавӣ омода мешаванд, ки ин тамоюл, албатта, натиҷаҳои дилхоҳ ба бор оварда истодааст.
Гулрухсор Тиллоева пешниҳод намуд, ки дар ҳамкорӣ бо вазорату идораҳо, мақомоти иҷроияи ҳокимияти давлатӣ, муассисаҳои илмӣ-тадқиқотӣ, маориф, тандурустӣ, зиёиён, иттиҳодияҳои ҷамъиятӣ, воситаҳои ахбори омма ва ҷомеаи шаҳрвандӣ ба тамоми муваффақиятҳои  шоён ноил хоҳем гашт.