Кишоварзони Ҳамадонӣ аз усулҳои муосир истифода менамоянд

Ҳамадонӣ, 11.11.2015 (АМИТ  «Ховар»)-Бо мақсади ба даст овардани фоидаи бештар ва истифодаи самараноки замин кишоварзони мамлакат аз усулҳои муосир истифода менамоянд. Гарчанде охири фасли тирамоҳ аст, вале дар ноҳияи Ҳамадонӣ то ҳол кишоварзон ҳосили парваридаашонро ҷамъоварӣ доранд. Имсол деҳқонони ноҳияи Ҳамадониро ташкилоти ҷамъиятии «Зан ва замин» дастгирӣ кард. 
Муваффақияти деҳқонон аз истифодаи хеле ками заҳрхимикатҳо ва истифодаи васеи нуриҳои органикӣ мебошад. Риояи қоидаҳои агротехникӣ ва интихоби тухмии хушсифат боиси фаровонҳосилӣ гардидааст. Хоҷагиҳои деҳқонӣ ва инфиродӣ бо корхонаи шарбатбарории ноҳия шартнома баста, як қисми маҳсулоташонро ба корхона супориданд ва истеҳсоли қуттиҳои шартӣ дар корхона афзоиш ёфт. Фаъол гардидани корхонаи шарбатбарорӣ ба муҳайё гардидани ҷойҳои корӣ мусоидат намуд. Имсол боз якчанд зану духтарони маҳаллӣ дар корхона соҳиби кор гардиданд ва бо кормандони собиқадор маҳсулоти истеҳсолнамудаашонро дар анбор ҷо ба ҷо мекунанд. Дар мавсими ҳосилғундорӣ корхонаи шарбатбарорӣ ба мушкилот рӯ ба рӯ гардида, маҳсулоти кишоварзонро, ки бо онҳо шартнома баста буд, пурра харида натавонист. Кишоварзон ва роҳбарияти корхонаи шарбатбарории ноҳияи Ҳамадонӣ соли оянда низ бо ташкилоти ҷамъиятии «Зан ва Замин» ҳамкорӣ карданианд, зеро муваффақияти имсола онҳоро руҳбаланд намудааст.