Ҳамадонӣ: Шудгору кишти тирамоҳӣ 90 фоиз анҷом ёфтааст

Ҳамадонӣ, 4. 12. 2015. (АМИТ «Ховар») — Кишоварзони ноҳияи Мир Саид Алии Ҳамадонӣ имсол дар майдони 5 ҳазору 330 гектар пахта кошта, мувофиқи дурнамо мебояд 12 ҳазору 259 тонна пахта ҷамъоварӣ намоянд. Хоҷагиҳои деҳқонии ҷамоати деҳоти Панҷоб дар ноҳия аввалин шуда, иҷрои нақшаи дурнаморо таъмин карданд ва имрӯзҳо илова ба нақша ҳосил меғундоранд. Новобаста ба харидор надоштани маҳсулот хоҷагидорон бо саҳмдоронашон ҳосили бо заҳмат парваридаашонро меғундоранд ва саҳмдоронро бо маош ва шароити лозимӣ таъмин менамоянд. Дар ҷамоати деҳоти Панҷоб ба кишти тирамоҳӣ низ аҳамияти хосса зохир мегардад. То имрӯз хоҷагиҳои деҳқонӣ 90 фоизи шудгору кишти тирамоҳиро ба анҷом расонидаанд. Дар ҳамаи заминҳои кишт техникаҳо фаъолият карда, рӯзҳои наздик кишти тирамоҳиро пурра ба анҷом мерасонанд. Дар баробари нақшаи пахта ва кишти тирамоҳӣ хоҷагидорони ҷамоати деҳоти Панҷоб дигар уҳдадориҳои хешро оид ба кишти сабзавот, истеҳсоли гӯшту шир, моҳӣ  ва ғалладона иҷро намуда, байни дигар ҷамоатҳои деҳот пешсаф мебошанд.