Кӯлоб: Ба қайд гирифтани 1678 ҷиноят дар соли 2015

Кӯлоб, 21.01.2016 (АМИТ «Ховар»)-Муовини сардори Раёсати корҳои дохилӣ дар минтақаи Кӯлоб Мирзозода Абдухолиқ зимни нишаси матбуотӣ аз натиҷаи корҳои соли 2015 иттилоъ дода, аз ҷумла зикр кард, ки кормандони милитсия дар натиҷаи корҳои фаврӣ ва ҷустуҷӯӣ дар минтақа ва шуъбаҳои зертобеи он 1678 ҷиноят ба қайд гирифта, аз ин 1453 ҷиноят тафтиш шудааст, ки 54 ҷиноят аз ҷониби ноболиғон содир шудааст.
Инчунин дар ин давра 7 ҷиноят дар ҳолати мастӣ, 216 ҷинояти вазнин, 10 ҷинояти куштор, 16 ҷинояти расонидани зарари ҷисмонӣ, 5 таҷовуз ба номус, 516 дуздӣ, 145 қаллобӣ, 170 ҷинояти иқтисодӣ, 133 ҷинояти вобаста ба маводи нашъадор ва дигар ҷиноятҳо ба қайд гирифта шудаанд. Ҳамчунин иттилоъ дода шуд, ки аз минтақаи Кӯлоб 100 нафар ба гурӯҳҳои ифротгаро дар Сурия ва Ироқу Шом шомил буда, нисбат ба онҳо парвандаи ҷиноятӣ кушода шудааст.