Кумитаи андоз барномаи компютерии электронии эъломияҳоро ба роҳ мондааст

Душанбе, 25.01.2015. (АМИТ «Ховар»).-“Кумитаи андози назди Ҳукумати Ҷумҳурии Тоҷикистон бо мақсади дар сатҳи замонавӣ ба роҳ мондани хизматрасонӣ ба андозсупорандагон барномаи компютерии ба тариқи электронӣ пешниҳод намудани эъломияҳоро ба роҳ мондааст, ки имрӯз бо истифода аз он зиёда аз 24 ҳазор (24000) андозсупоранда эъломияҳои худро пешниҳод намуда истодаанд”,-гуфт раиси Кумитаи андози кишвар Нусратулло Давлатзода имрӯз дар нишасти матбуотии ин ниҳод.
Ба гуфтаи масъулини ин ниҳод аз 1 июли соли 2015 тартиби дар шакли электронӣ истифода бурдани ҳисобнома-фактураҳои андоз аз арзиши иловашуда мавриди истифода қарор дода шуд. Барои беҳтар намудани хизматрасонӣ, истифодаи ин тартиб ва таҳия намудани санадҳои муқоисавӣ оид ба ҳолати ҳисоббаробаркунӣ бо буҷет дар нозироти андоз терминалҳо кушода шуда истодаанд, ки бо таҷҳизоти компютерӣ ва мутахассисон таъмин мебошанд.
Чунин терминалҳо аллакай дар нозироти андоз дар шаҳри Душанбе, шаҳрҳои Кӯлоб, Қурғонтеппа ва Хуҷанд кушода шуда, дар назар дошта шудааст, ки чунин терминалҳо давра ба давра дар дигар нозироти андоз низ ташкил шаванд.