11 -умин Ҷоми футзали Осиё барои мунтахаби Эрон

Душанбе, 22.02.2016. (АМИТ «Ховар»). Дар шаҳри Тошканд Чемпионати Осиё оид ба футзал ба поён расид. Дар вохӯрии ниҳоӣ соҳибони толор -футзалистони Узбекистон бо мунтахаби Эрон ба дидори ҳам рафтанд. Футболбозони Узбекистон дар дақиқаи 6-ум бо голи Дилшод Ирсалиев ба сафи пеш баромаданд. Баъди се дақиқа Қудрат Баҳодурӣ натиҷаро мусовӣ кард. Голи капитани мунтахаби Эрон Муҳаммад Кишоварз имкон надод, ки мунтахаби Ӯзбекистон дар майдонаш ба гирифтани аввалин унвони чемпиони Осиё комёб шавад. Мунтахаби Эрон бошад, маротибаи 11-ум соҳибунвон гардид.
Дар мусобиқа барои ҷои сеюм Ветнам ва Таиланд, ки дар як гурӯҳ бо дастаи мунтахаби Тоҷикистон қарор доштанд, барои ба даст овардани медалҳои биринҷӣ бо ҳам бори дигар қувва озмуданд. Ин маротиба низ таиландиҳо соҳиби бартарӣ буданд ва дар натиҷа бо ҳисоби 8 бар 0 ғалаба карда, мақоми сеюмро ба даст оварданд.
Ҳамин тавр, дастаҳои мунтахаби Эрон, Узбекистон, Таиланд, Вентам ва Австралия соҳиби роҳхат ба бозиҳои ниҳоии Ҷоми ҷаҳон дар Колумбия гардиданд. Тими мунтахаби Қирғизистон низ қариб буд ба бозиҳои ниҳоии Ҷоми ҷаҳон роҳхат гирад, аммо бохт бо ҳисоби 3 бар 1 аз мунтахаби футзали Австралия ин дастаро аз чунин имконият маҳрум кард.