А. Исломзода: « Дастрасии аҳолии кишвар ба оби тозаи ошомиданӣ дар ду сол то 10% афзудааст»

Февраль 25, 2016 09:02

Душанбе, 25.02.2016.(АМИТ «Ховар»).- «Беш аз 57 фоизи аҳолии Тоҷикистон ба оби тозаи ошомиданӣ дастрасӣ доранд, ки аз ин омор танҳо 12 фоиз ба деҳот ва боқимонда ба шаҳрҳо рост меояд»,- гуфт Алимурод Исломзода, директори кулли Корхонаи воҳиди давлатии «Хоҷагии манзилию коммуналӣ» дар ҷаласаи дуюми гурӯҳи кории байниидоравӣ оид ба оби нӯшокӣ, таъминоти оби ошомиданӣ ва беҳдоштӣ дар деҳоти Тоҷикистон. Мавсуф зикр кард, ки омори дастрасии мардуми кишвар ба оби тозаи ошомиданӣ ду сол қабл 47 фоизро ташкил медод.
Дар ҷаласа ҳамзамон Султон Раҳимзода- муовини аввали
вазири энергетика ва захираҳои оби ҷумҳурӣ доир ба сиёсати пешгирифтаи Ҳукумати Ҷумҳурии Тоҷикистон дар самти тадбирҳои таъмини аҳолии кишвар бо оби тозаи ошомиданӣ, таҷдиду навсозии низоми обрасонию корезӣ ибрози назар намуда, зикр кард, ки дар ин бахш Ҳукумати мамлакат дар ҳамкорӣ бо институтҳои байналмилалии молиявӣ ва дигар шарикони рушд корҳои назаррасро ба анҷом расонидааст.
Дар ҷаласа ҳамзамон намояндагони Агентии Швейтсария оид ба рушд ва ҳамкорӣ, Барномаи рушди Созмони Милали Муттаҳид, Оксфам, намояндагони дигар вазорату идораҳои марбутаи кишвар ва коршиносон доир ба паҳлӯҳои татбиқи лоиҳаи таъминоти оби нӯшокӣ ва беҳдоштӣ дар деҳоти Тоҷикистон, «Консепсияи ислоҳоти хоҷагии манзилию коммуналӣ дар Ҷумҳурии Тоҷикистон дар давраи солҳои 2010-2020», таъмиру таҷдид ва рушди шабакаҳои обрасонӣ, роҳҳои самараноки ташкили низоми оби нӯшокӣ ва соири масоили марбут ба таъмини оби нӯшокӣ ва беҳдоштӣ дар кишвар ибрози назар намуданд.
Бояд тазаккур дод, ки марҳилаи якуми лоиҳаи таъминоти оби нӯшокӣ ва беҳдоштӣ дар деҳоти Тоҷикистон соли 2014 амалӣ шуд. Дар натиҷаи он дар ҷумҳурӣ Қонун «Дар бораи оби нӯшокӣ» қабул гардид. Инчунин дар ноҳияи Рӯдакӣ се нуқтаи обрасонӣ сохта шуд.
Марҳилаи дуюми лоиҳа аз ду қисм- таҳлилию тадқиқотӣ ва амалӣ иборат аст. Дар асоси қисми амалии он интизор меравад, ки дар се ҷамоати минтақаи Кӯлоб нуқтаҳои обрасонӣ сохта шаванд. Инчунин қисми тадқиқотии лоиҳа фарогири масъалаҳои таҳлилию қонунгузорист. Иштирокдорони ҷаласа ҳамзамон доир ба усулҳои босамари тиҷорат барои ташкили хизматрасониҳои таъминоти оби нӯшокӣ ва беҳдоштӣ дар деҳоти Тоҷикистон, шаклҳои гуногуни ташкилие, ки барои истифодаи низомҳои оби нӯшокӣ муҳиманд, хусусан шаклҳои нави идораи низоми оби нӯшокӣ, ки дар маҳалҳо интихоб ва истифода менамоянд, истифодаи шаклҳои мавҷуда, аз ҷумла таҳлили муқоисавӣ дар доираи қонунгузории миллӣ табодули назар карда, пешниҳодҳои самарабахш ироа намуданд.

Февраль 25, 2016 09:02

Хабарҳои дигари ин бахш

Дар Маҷлиси намояндагон оид ба пешгирии никоҳи бармаҳал ва ҷалби духтарон ба касбомӯзӣ ҳамоиш доир шуд
Ҳамкории Тоҷикистон ва Чин дар соҳаи тандурустӣ густариш меёбад
Шоҳҷоизаи озмуни ҷумҳуриявии «Беҳтарин ҳамсар» ба Хушомад Алидодов ва «Беҳтарин оилаи ҳунарманд» ба Дилдора Азимова дода шуд
Ҳунармандони шаҳри Кӯлоб дар озмуни «Ҳунарманди сол» сазовори баҳои баланд гардиданд
ТАВСИЯИ СУДМАНД. Аз сардиҳои фасли зимистон худро эҳтиёт намоед
35-СОЛАГИИ ИСТИҚЛОЛИ ДАВЛАТӢ. Дар Ҷайҳун бинои баландошёнаи истиқоматӣ ва шуъбаи маориф ба истифода дода шуд
Намояндаи Тоҷикистон дар Фаронса дар вохӯрии шарикони рушди ҷаҳонӣ иштирок намуд
МАСЛИҲАТИ МУТАХАССИС. Ҳангоми зуком сайру гашт дар ҳавои тоза ва худдорӣ аз ҷойҳои серодам тавсия дода мешавад
Дар ноҳияи Рашт китобхона ва бунгоҳи тиббӣ сохта ба истифода дода шуд
«БЕҲТАРИН ОИЛАИ ҲУНАРМАНД». Қутбия Наимова бо ҳунари нонпазӣ ба даври ҷумҳуриявии озмун роҳ ёфт
САФАРАТОН БОБАРОР ВА БЕХАТАР БОД! Тавсияҳои IRS ба ронандагон вобаста ба фаро расидани мавсими сармо
Дар Душанбе Озмуни ҷумҳуриявии «Ҳунарманди сол» ҷамъбаст гардид