Ҳаҷми содироти энергияи барқ ба хориҷа 18,5 млн. кВт.соат афзоиш ёфт

Душанбе, 5.02.2016 (АМИТ «Ховар»).- “Бо мақсади таъмини соҳаҳои иқтисодиёт ва аҳолии ҷумҳурӣ бо энергияи  барқ дар соли 2015 ширкати «Барқи Тоҷик» дар ҳаҷми 2 млрд. 564,3 млн. кВт.соат энергияи барқро харидорӣ намуд”-,гуфт раиси ШСХК «Барқи Тоҷик» Исмоилзода Мирзо Иброҳим дирӯз зимни нишасти матбуотӣ.

Раиси ширкат илова намуд, ки ҳаҷми  содироти энергияи  барқ ба хориҷи ҷумҳурӣ дар давраи ҳисоботӣ нисбат ба соли 2014 дар ҳаҷми 18,5 млн. кВт.соат афзоиш ёфт, ки он асосан дар фаслҳои гарм сурат гирифтааст. Аз ҷумла, ба  Ҷумҳурии Исломии Афғонистон дар ҳаҷми 1 млрд. 180,9 млн. кВт.соат  барқ  содирот гардидааст.

“Дар соли 2015 ҳаҷми фоиданоки энергияи барқи ба муштариёни ҷумҳурӣ интиқолшуда ба 12 млрд. 815,7 млн. кВт.соат баробар шуд, ки нисбат ба соли 2014 дар ҳаҷми 827,2 млн.кВт.соат  зиёд мебошад”,-афзуд Исмоилзода Мирзо.