А. Наимӣ: Гурӯҳи тафтишотӣ зарари ба давлат расонидаи А. Назарзода ва М. Кабириро ошкор намуда истодааст

Душанбе, 2.02.2015. (АМИТ «Ховар»).-«Дар асоси қарори роҳбари гурӯҳи тафтишотии Прокуратураи генералӣ аз ҷониби мутахассисони агентӣ дар 12 биною иншоот ва ҷамъиятҳои саҳомии хусусигардонидашудаи мутааллиқ ба собиқ муовини вазири мудофиа Абдуҳалим Назарзода ва наздикони ӯ санҷиши дурусти асосноккунии хусусигардонии онҳо гузаронида шуда истодааст. Танҳо дар 8 иншооти таҳти санҷиш қарордодашуда муайян гардид, ки ҳангоми хусусигардонии амволи давлатӣ ва ҷалби қарзҳои бонкӣ бо роҳи сохтакорӣ ба давлат 5,3 миллион сомонӣ зарари молиявӣ расонида шудааст»,- иброз намуд Аламхон Наимӣ, муовини авали директори Агентии назорати давлатии молиявӣ ва мубориза бо коррупсияи Ҷумҳурии Тоҷикистон имрӯз зимни нишасти матбуотӣ.
Ба гуфтаи Аламхон Наимӣ инчунин аз ҷониби кормандони агентӣ, ки ба гурӯҳи фаврӣ — тафтишотӣ вобаста ба парвандаи ҷиноятӣ нисбат ба Муҳиддин Кабирӣ ва наздикони ӯ шомил шудаанд, 42 бинои маъмурию манзилҳои истиқоматӣ ва 70 номгӯй молу амволи дигар ошкор гардиданд.