Бохти “Хуҷанд” дар Фаластин

Душанбе, 10.02.2016 (АМИТ «Ховар»). «Хуҷанд»-и Хуҷанд бо вуҷуди тайёрии пухта дар ягона бозии то гурӯҳии Ҷоми конфедератсияи футболи Осиё аз ҳарифи нисбатан пурқувваташ “Аҳлӣ Алхалил”-и Фаластин бо ҳисоби 1 бар 0 мағлуб шуд.
Дақиқаи 21-ум барои хуҷандиҳо нобарор омад ва голи задаи Маҳмуд Водӣ клуби футболи “Аҳлӣ Алхалил”-ро ба бозиҳои гурӯҳии Ҷоми Осиё роҳнамун сохт. Дар радифи ин бозиҳо дастаи ҳамсоякишвари мо “Алай”-и Қирғизистон низ аз дастаи “Триполӣ”-и Лубнон дар задани зарбаҳои 11-метраи баъди бозӣ бо натиҷаи 7 бар 6 мағлуб шуд.
“Балкан”- и Туркманистон ҳам дар сафар аз клуби футболи “Алҷайш”-и Сурия бо натиҷаи 2 бар 0 шаҳди бохтро чашид. Дар бозии сеюми рӯз “Алҳидд”-и Баҳрайн “К Электик”-и Покистонро бо ҳамон натиҷаи 2 бар 0 паси сар гузошт. Акнун ин дастаҳо муборизаро барои Ҷом дар гурӯҳҳо идома медиҳанд.