Британияи Кабир барои дастгирӣ аз татбиқи амалии лоиҳаи минтақавии CASA-1000 37 млн. доллар ҷудо намудааст

Душанбе, 17.02.2016. /АМИТ “Ховар”/.-«Британияи Кабир дар тӯли панҷ соли охир дар ҳаҷми 75 миллион доллари амрикоӣ лоиҳаҳои мухталифро дар Ҷумҳурии Тоҷикистон мавриди татбиқи амалӣ қарор додааст. Илова бар ин Британияи Кабир барои татбиқи амалии лоиҳаи минтақавии CASA-1000 ба маблағи 37 миллион доллари амрикоӣ сармоягузории мустақим гирифтааст»,-чунин изҳор дошт дар назди хабарнигорон вазири давлатии рушди байналмилалии Британияи Кабир Десмонд Свейн баъди мулоқот бо Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки имрӯз дар Қасри миллат доир гардид.
Десмонд Свейн ҳамчунин иброз намуд, ки Британияи Кабир тасмим гирифтааст татбиқи амалии минбаъдаи лоиҳаҳои дигари минтақавиро дар Ҷумҳурии Тоҷикистон идома диҳад.
Ба гуфтаи Десмонд Свейн зимни мулоқот ҷонибҳо ба нуқтаи муҳими дигар-эҷоди ҷойҳои нави корӣ мароқ зоҳир карда, таъкид намуданд, ки ҷомеаи ҷаҳониро зарур аст, тӯли даҳсолаи оянда дар миқёси ҷаҳон 600 миллион ҷойи нави кориро ба хотири ҷилавгирӣ аз гаравидани доираи ҷавонон ба гурӯҳҳои ифротӣ эҷод намояд. Ин ҷойҳои нави корӣ бояд дар Британияи Кабир, Ҷумҳурии Тоҷикистон ва ҳамин гуна дар тамоми миқёси ҷаҳон эҷод шаванд.