Мулоқоти Ш. Зуҳуров бо сокинони Тоҷикобод доир ба ташреҳи Паёми Пешвои миллат

Душанбе, 20.02.2016. (АМИТ «Ховар»). — Субҳи имрӯз дар ноҳияи Тоҷикобод вохӯрии Раиси Маҷлиси намояндагони Маҷлиси Олии Ҷумҳурии Тоҷикистон Шукурҷон Зуҳуров бо интихобкунандагон баргузор гардид. Дар мулоқот бо сокинони ноҳияи Тоҷикобод Шукурҷон Зуҳуров бо камоли ифтихор салому паёми самимонаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва таманниёти беҳтаринашонро ба сокинони ноҳияи зебоманзари Тоҷикобод расонид.

Раиси Маҷлиси намояндагони Маҷлиси Олии Ҷумҳурии Тоҷикистон Шукурҷон Зуҳуров ба сокинон ташакур баён кард, ки бо шарофати раъйҳои онҳо дубора ба мандати вакили Маҷлиси намояндагони Маҷлиси Олии Ҷумҳурии Тоҷикистон мушараф гардидааст ва ваъда дод, ки тамоми донишу тавоноӣ, таҷрибаву имкониятҳоро сарфи он мекунад, ки ба ин боварии мардум сазовор буда, барои ба марҳилаи сифатан нав ворид гардидани парлумони кишварамон мусоидат намояд.

Шукурҷон Зуҳуров дар вохӯрӣ муҳтавои Паёми навбатии Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро
шарҳ ва тафсир намуд ва муфассал дар бораи беҳтар кардани шароити зиндагии мардум, соҳаҳои кишоварзӣ, энергетика, маориф, ҷавонон варзиш ва сайёҳӣ , тандурустӣ, дар самтҳои қонунгузорӣ, дастовардҳои соли 2015 ва мубориза бар зидди экстремизм ва тероризм сухан ронд.

Дар охир Раиси Маҷлиси намояндагони Маҷлиси Олии Ҷумҳурии Тоҷикистон Шукурҷон Зуҳуров таъкид намуд, ки мо ҳама вазифадорем, ки таҳти роҳбарии Асосгузори сулҳу ваҳдати миллӣ, Пешвои Миллат, Президенти Ҷумҳурии Тоҷикистон муҳтарам Эмомалӣ Раҳмон барои босифат ва дар сатҳи баланд амалӣ гаштани тамоми дастуру супоришҳои дар пайёми имсола омада пайваста кӯшиш намоем.