Нақшаи бунёди корхонаи меваю сабзавот бо арзиши 400 ҳазор сомонӣ

Исфара,10.02.2016 (АМИТ «Ховар»).- Cоҳибкор Абдуманнон Эрматов тасмим дорад, дар давоми ду соли оянда аз ҳисоби маблағҳои худӣ дар ҷамоати деҳоти Навгилеми шаҳри Исфара корхонаи коркарди меваю сабзавотро бо арзиши лоиҳавии 400 ҳазор сомонӣ бунёд намояд.
Дар ин бора Ёддошти тафоҳум байни мақомоти иҷроияи ҳокимияти давлатии шаҳри Исфара дар симои раиси шаҳр Расулзода Дилшод Ҷабборӣ ва соҳибкор Абдуманнон Эрматов ба имзо расид.
Ёддошти мазкур дар мулоқоте, ки Расулзода Дилшод Ҷабборӣ бо роҳбарони корхонаҳо ва соҳибкороне, ки ба содироти маҳсулоти кишоварзӣ машғуланд, рӯйи кор омад.
Абдуманнон Эраматов соҳибкори муваффақ дар соҳаи саноати коркарди меваю сабзавот дар Исфара ба ҳисоб рафта, сарвари корхонаи хурди консервабарории «Субҳи Ватан» мебошад. Корхонаи «Субҳи Ватан» алҳол бо хоҷагиҳои кишоварзӣ барои харидории меваю сабзавот шартномаҳо баста истодааст.