Олмон барои гурезагоне, ки ба ҷомеаи онҳо омехта намешаванд, кумакпулиро кам мекунад

Душанбе, 02.02.2016 (АМИТ «Ховар»). — Ба он гурезагоне, ки дар курсҳои забономӯзӣ иштирок кардан намехоҳанд ва ба арзишҳои хоси Олмон эҳтиром намегузоранд, кумакпулии кам дода хоҳад шуд. Дар ин бора вазири меҳнат ва корҳои иҷтимоии Олмон Андреа Налес хабар медиҳад.
«Мо кумакпулии онҳоеро, ки хоҳиши бо мо омехта шудан надоранд, кам мекунем», — гуфт ӯ.
Ба гуфтаи вазир, гурезагон бояд дар курсҳои забони олмонӣ иштирок карда, қоидаҳои рафторро, ки дар Олмон қабул шудаанд, риоя намоянд.
«Раванди омехташавӣ дар он вақт муваффақ мегардад, ки агар ҳар фард, махсусан худи гурезагон ба он саҳми худро гузоранд. Ҳар касе, ки ба ин ҷо барои гирифтани ҳимоя ва оғози зиндагии нав меояд, бояд қоидаҳо ва арзишҳои моро риоя намояд», — зикр кард ӯ.
Бояд гуфт, ки соли 2015 ба Олмон қариб 1,1 миллион гурезагон, пеш аз ҳама, аз Сурия ва Ироқ ворид шудаанд. Канслери Олмон Ангела Меркел итминон дорад, ки онҳо пас аз анҷоми ҷанг дар кишварашон аз Олмон мераванд.