Ширин Қурбонова раиси ташкилоти “Илмпешагон” гардид

Душанбе, 10.02.2016. (АМИТ «Ховар»). -Дар Академияи илмҳои Ҷумҳурии Тоҷикистон маҷлиси ҳисоботии ташкилоти ибтидоии ҳизбии “Илмпешагон”-и Ҳизби Халқии Демократии Тоҷикистон баргузор гардид.
Раиси ташкилоти ибтидоии ҳизбии “Илмпешагон”-и ҲХДТ дар АИ ҶТ, президенти АИ ҶТ Фарҳод Раҳимӣ дар бораи нуктаҳои асосии Паёми Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон ибрози андеша намуда, гуфт, ки дар Паёми навбатӣ махсусан дар мавриди тарбияи ҷавонон дар руҳияи худшиносии миллӣ, пешгирии онҳо аз пайвастан ба гурӯҳҳои тундгаро ва ҳифзи манфиатҳои миллӣ, ҳимояи дастовардҳои замони Истиқлолият, баланд бардоштани илму фарҳанги сиёсии ҷавонон, дастгирии соҳибкорони ҷумҳурӣ, ҷалби сармояи хориҷӣ, таъсиси ҷойҳои нави корӣ ва дигар масоили марбут ба амният ва рушду тараққиёти кишвар андешаҳои судманд иброз гардиданд.
Дар Паёми Президенти кишвар паҳлуҳои гуногуни илму маорифи кишвар мавриди таҳлил қарор гирифтанд, ки ба рушди низоми таълиму тарбия, бахусус фанҳои дақиқ, технологияи иттилоотӣ ва забонҳои хориҷӣ, аз ҷумла русӣ ва англисӣ равона гардидаанд.
Дар ҷамъомад зикр гардид, ки аз моҳи октябри соли 2015 то моҳи январи соли 2016 — 370 корманди Раёсат ва муассисаҳои илмии зертобеи АИ ҶТ ба сафи ҲХДТ шомил шуданд.
Дар маҷлиси солона Ширин Қурбонова аз ҷониби аъзои ҳизб якдилона раиси ташкилоти ибтидоии ҳизбии “Илмпешагон”-и ҲХДТ дар АИ ҶТ ва Илҳоми Баҳром муовини раиси ташкилот интихоб гардиданд.