Таъмини робитаи боэътимоди нақлиётӣ омили муҳими рушди кишвар мебошад

Душанбе, 03.02.2016. (АМИТ «Ховар»). — Таҷдиди роҳҳои мошингарди Душанбе — Турсунзода, Айнӣ -Панҷакент ва сохтмони пул аз болои дарёи Ванҷоб дар километри 456 — уми роҳи мошингарди байналмилалии Душанбе — Кӯлоб — Хоруғ — Мурғоб — ағбаи Қулма- сарҳади Ҷумҳурии Мардумии Чин, ки аҳамияти муҳиму стратегии нақлиётӣ доранд, соли ҳисоботӣ амалӣ гардиданд. Дар ин бора имрӯз зимни нишасти матбуотӣ вазири нақлиёт Шералӣ Ганҷалзода иттилоъ дод.
Таъмини робитаи боэътимоди нақлиётӣ омили муҳими рушди кишвар дар марҳилаи ҷаҳонишавии босуръати иқтисодиёт маҳсуб шуда, он ба истифодаи самаранок ва риояи мақсадноки талаботи Конвенсия ва созишномаҳои байналмилалию минтақавӣ поягузор мебошад.
«Барои тахкимбахшии робитаҳои байналмилалӣ 72 маротиба вохӯрии роҳбарият ва коршиносони вазорат бо намояндагии ширкату созмонҳои байналмилалӣ ва мамлакатҳои хориҷӣ ва 4 чорабинии минтақавию байналмилалӣ доир ба мавзӯъҳои мухталифи вобаста ба рушди соҳа баргузор гардид. Дар натиҷаи музокироти судманд 5 санади муҳими байналмилалӣ ба имзо расиданд»,-илова намуд вазири нақлиёт.