Вазири Бритониё Десмонд Свейн сафари худро ба анҷом расонид

Душанбе, 17.02.2016. (АМИТ «Ховар»). -Аз 15 то 17-уми феврали соли равон вазири давлатии Британия Кабир оид ба рушди байналмиллалӣ Десмонд Свейн аз Тоҷикистон боздид ба амал овард.
Десмонд Свейн тӯли сафари дурӯза бо Президенти Ҷумҳурии Тоҷикистон Эмомалӣ Раҳмон, вазири рушди иқтисод ва савдо Ҳикматулло Неъматзода мулоқот намуда, ҳамроҳ бо вазири энергетика ва захираҳои оби Тоҷикистон Усмоналӣ Усмонзода аз НБО-и Норак дидан кард. Ҳамчунин бо намояндагони ҷомеаи шаҳрвандӣ, бахши хусусӣ ва шарикони рушд, ки дар Тоҷикистон фаъолият доранд, вохӯрӣ намуд.
Дар анҷоми сафари худ Десмонд Свейн иброз намуд, ки Британияи Кабир дар дастгирии рушди устувор, пешрафт ва идораи хуби давлатии Тоҷикистон паймон дорад ва дар марҳалаи анҷом додани нақшаҳои барномаҳои оянда дар соҳаҳои идораи давлатӣ ва рушди фарогири иқтисодӣ қарор дорад. Ин нуктаҳо барои Тоҷикистон дар роҳи расидан ба ҳадафҳои рушди иқтисодӣ ва паст кардани сатҳи камбизоатӣ муҳиманд.
Ӯ ҳамчунин изҳор кард, ки: «Мамнунам аз имконияти мулоқот доштан бо намояндагони расмии давлатӣ, бахши хусусӣ ва ҷомеаи шаҳрвандӣ ва суҳбатҳое, ки атрофи корҳои муҳими анҷомшуда ва чолишҳои дар пеш буда доштем. Кумаки Британия Кабир дар соҳаҳои рушди кишоварзӣ, тавонмандсозии иқтисодии занҳо ва беҳтарсозии мудирияти молияи давлатӣ аллакай ба натиҷаҳои самаранок ноил гаштааст.
Ман умедвори таҳкими ҳамкории Британия ва Тоҷикистон мебошам».