Вохӯрии кормандони ММТ бо хатмкунандагони муассисаи таҳсилоти миёна барои ношунавоён

Душанбе, 25.02.2016. (АМИТ «Ховар»). — Дар чаҳорчӯбаи корҳои иттилоърасонию таблиғотӣ дар Муассисаи давлатии таҳсилоти миёнаи умумии махсус барои ношунавоён дар шаҳри Душанбе роҳбарият ва кормандони Маркази миллии тестии назди Президенти Ҷумҳурияти Тоҷикистон бо хатмкунандагон, падару модарони хатмкунандагон ва омӯзгорони муассисаи мазкур вохӯрӣ баргузор намуданд. Зимни вохӯрӣ директори Марказ Хуршед Тешаев низоми имтиҳонҳои марказонидаи дохилшавӣ ва муҳимтарин раванду марҳалаҳои он, аз омодагию бақайдгирӣ то эълони натиҷаҳои озмуни тақсимотро муаррифӣ намуд. Муаррифӣ барои хатмкунандагон бо мадади тарҷумони имову ишора пешниҳод карда шуд.
Дар баробари ин, хатмкунандагон, падару модарон ва омӯзгорон дар мавзӯъҳои гуногун, аз ҷумла, имтиёзҳо барои маъюбон, талабот барои интихоби ихтисосҳо ва тартиби имтиҳонсупорӣ барои довталабони имкониятҳои ҷисмониашон маҳдуд саволҳо доданд, ки ба онҳо ҷавобҳои муафассал пешниҳод шуданд.
Намояндагони Маркази миллии тестии назди Президенти Ҷумҳурии Тоҷикистон ба директори Муассисаи давлатии таҳсилоти миёнаи умумии махсус барои ношунавоён дар шаҳри Душанбе Ҳусния Абдураззоқова барои омодагии хатмкунандагон дастури иттилоотию методии «Роҳнамои довталаб», Маҷмӯаи саволу масъалаҳои тест ва ба хатмкунандагон туҳфаҳои хотиравӣ тақдим карданд.