Вохурӣ бо аҳолии шаҳри Роғун дар доираи Паём

Роғун, 19.02.2016 (АМИТ «Ховар»).- Муддати 4 рӯз мешавад, ки дар ҷамоатҳои шаҳраку деҳоти шаҳри Роғун намояндагони гурӯҳҳои таблиғотии Дастгоҳи иҷроияи Президенти Ҷумҳурии Тоҷикистон бо роҳбарии сармутахассиси шуъбаи илм ва маърифати Дастгоҳи иҷроияи Президенти Ҷумҳурии Тоҷикистон Алиҷон Шоназаров, корманди Маркази исломшиносӣ Қамар Нурулҳақов, раиси шаҳр Шарифзода Шариф Файз ва намояндагони мақомоти ҳифзи ҳуқуқу кормандони дастгоҳи раиси шаҳр барои ба таври сода фаҳмонидани муҳтаво ва ҳадафҳои Паёми Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо сокинон мулоқот доранд.
Дар маҷлисҳои мазкур намояндагони гурӯҳҳои таблиғотӣ доир ба ҳифзи амнияти миллӣ, нагаравидани ҷавонон ба гурӯҳҳои терористӣ, сулҳу субот ва оромии кишвар, соҳаи тандурустию маорифпарварӣ ҳарф зада, аз шаҳрвандон даъват ба амал оварданд, ки дар атрофи Пешвои миллат Эмомалӣ Раҳмон ҷамъ омада, кишварро дар якҷоягӣ боз ҳам ободтару зеботар гардонанд.