Дар Фестивал-озмуни телевизионии «Бӯстон-2017» дар Тоҷикобод фарҳанги миллии либоспӯшӣ намоиш дода шуд
![](https://khovar.tj/wp-content/uploads/2017/08/To-ikobod.-_B-ston-2017.jpg)
ТОҶИКОБОД, 10.08.2017 /АМИТ «Ховар»/. Дар Кохи фарҳанги ноҳияи Тоҷикобод даври ноҳиявии Фестивал-озмуни телевизионии ҷумҳуриявии эҷодиёти халқ «Бӯстон-2017» баргузор шуд. Дар қисмати аввали он ҳунарҳои мардумӣ, либосҳои миллӣ ва зиёда аз 30 номгӯй хӯрокҳои миллии минтақа ба намоиш гузошта шуд.
Мутахассиси бахши занон ва оилаи ноҳия Нишона Сафарова ба хабарнигори АМИТ «Ховар» иброз дошт, ки Фестивали «Бӯстон-2017» бо мақсади эҳёи мероси фарҳангӣ ва дарёфти чеҳраҳои нав аз миёни ҷавонону наврасон дар ҷодаи санъати рақс, сурудхонӣ, навозандагӣ, овозхонӣ, ҳаҷву мутоиба ва бадеҳахонӣ, инчунин ҷалби занону духтарон ба фарҳанги миллии либоспӯшӣ, худогоҳиву хештаншиносӣ, эҳтиром ба арзишҳо ва фарҳанги миллӣ гузаронида шуд.
Ҳакамон ба маҳорату ҳунарнамоии наврасону ҷавонони ноҳияи Тоҷикобод баҳои баланд дода, онҳоро бо дипломҳои Муассисаи давлатии телевизиони «Сафина» сарфароз гардониданд.