Ҳадаф — пешгирии ҷинояткорӣ

Душанбе, 11.03.2016. (АМИТ «Ховар»).- Мақсад аз доир намудани вохӯрии пайвастаи кормандони мақомоти корҳои дохилӣ бо мактаббачагону донишҷӯён пешгирии шомилшавии наврасону ҷавонон ба ҳар гуна ҳизбу ҳаракатҳои террористиву экстремистӣ, тарбияи дурусти насли наврас ва воқиф намудани онҳо аз авзои кунунии ҷомеаи ҷаҳон буда, ба ин васила робитаи милитсия бо ҷомеа мустаҳкам мегардад.
10 март ёрдамчии сардори шуъбаи Вазорати корҳои дохилӣ дар ноҳияи Исмоили Сомонӣ, подполковники милитсия Ҷӯрабек Давлатов ва нозири калони бахши Хадамоти пешгирии ҳуқуқвайронкунӣ дар байни наврасону ҷавонони ин шуъба Тоҷиддин Исоев ва гурӯҳи ҷавонони «Пешоҳанг» дар мактаби миёнаи №14-и шаҳри Душанбе вохӯрӣ доир намуданд.
Узви фаъоли гурӯҳи ҷавонони «Пешоҳанг» Аслиддин Хушвахтов хонандагонро ба илмомӯзӣ ва дуруст истифода бурдани вақт раҳнамун сохта, онҳоро ояндаи давлату миллат муаррифӣ намуд. Мавсуф аз ғамхориҳои Ҳукумати мамлакат нисбат ба ҷавонону наврасон ёдовар шуда, изҳори таассуф намуд, ки бо вуҷуди дастгириҳои пайваста ҳастанд нафароне, ки ба қадри обу хоки ин диёр нарасида, ба андешаҳои ботилу бепояи худ дода шуда, дар муноқишаҳои давлати Сурияву Ироқ ширкат намуда, номи худу аҳли оилаи худро доғдор месозанд.
Дар идома намояндагони мақомоти корҳои дохилӣ аз вазъи ҳуқуқвайронкуниву ҷинояткорӣ бо иштироки ҷавонону наврасон сухан ронда, толибилмонро ба одоби накӯ ва рафтори намунавӣ даъват намуданд.