Дар Раёсати АНМН семинари таҳлилгарон оғоз гардид

Душанбе, 15.03.2016. (АМИТ «Ховар»).-Аз тарафи шуъбаи иттилоотӣ-таҳлилии Агентии назорати маводи нашъаовари назди Президенти Ҷумҳурии Тоҷикистон дар Раёсати агентӣ дар вилояти Суғд дар доираи нақшаи чорабиниҳои татбиқи «Стратегияи миллии мубориза бар зидди гардиши ғайриқонунии маводи мухаддир дар Ҷумҳурии Тоҷикистон барои солҳои 2013-2020» аз 14-уми март семинари омӯзишӣ оғоз шуд, ки то 18 марти соли равон идома хоҳад ёфт.
Ба семинари мазкур намояндагони раёсатҳои Вазорати корҳои дохилӣ, Кумитаи давлатии амнияти миллӣ, Хадамоти гумруки назди Ҳукумати Ҷумҳурии Тоҷикистон ва шуъбаҳои Раёсати агентӣ дар минтақаи Зарафшон ва шаҳри Исфараи вилояти Суғд даъват шудаанд.
Дар ифтитоҳи семинар сардори раёсати агентӣ дар вилояти Суғд М. Ҳотамӣ омодагии ҳамаҷонибаи раёсати агентиро барои ҳамоҳанг сохтани фаъолияти мақомоти ҳифзи ҳуқуқ ва сохторҳои қудратии вилоят бобати муқовимат ба муомилоти ғайриқонунии маводи мухаддир ва пешгирии нашъамандӣ изҳор дошта, гузаронидани ин гуна семинарҳои омӯзиширо дар баланд бардоштани савияи дониши касбии иштирокдорон муҳим арзёбӣ намуд.
Тавре ки иштирокдорони семинар иброз доштанд, мақсади он расонидани ёрии амалӣ ба масъулин оид ба омода кардани ҳисобот ва табодули маълумот байни мақомот доир ба мусодираи маводи мухаддир аз муомилоти ғайриқонунӣ мебошад.