Мубориза бар зидди малах кори дастаҷамъона аст

Душанбе, 18.03.2016 (АМИТ «Ховар»).-Дар ноҳияи Ҷайҳун машварати вилоятӣ “Оид ба ташкили усулҳои мубориза бар зидди малах” баргузор гардид. Дар машварат вазири кишоварзӣ Муҳаммадтоир Зокирзода, муовини аввали раиси вилояти Хатлон Қурбон Ҳакимзода, раиси ноҳия Аминзода Фотеҳ ва масъулини соҳаи кишоварзии шаҳру ноҳияҳо ширкат варзиданд.
Дар қисми амалии чорабинӣ ҳозирин бо усулҳои мубориза бар зидди малах аз тариқи механикӣ, агротехникӣ, кимиёвӣ ва биологӣ, ҳамчунин омода намудани маҳлулҳо ва истифодаи дурусти заҳрдоруҳо ошно гардиданд. Дар қисми назариявӣ сардори КҶВД “Мубориза бар зидди малах”-и Вазорати кишоварзӣ К. Ғаниев оид ба мушоҳида, паҳншавӣ, инкишоф ва усулҳои мубориза бар зидди малахи марокашӣ ибрози андеша намуд.
Дар машварат зикр гардид, ки мутахассисони соҳа дар 16 шаҳру ноҳияи вилоят пайдоиш ва ҷойҳои тухмгузории малахро дар фаслҳои сол мушоҳида намудаанд. Соли равон бояд дар майдони беш аз 50 ҳазор гектар коркарди кимиёвӣ гузаронида шавад. Хавфи зиёни малахи марокашӣ ба хоҷагии халқ, аз ҷумла ба соҳаи кишоварзӣ ҷиддист. Аз ин рӯ, мубориза бар зидди ин ҳашарот бояд дастаҷамъонаю оқилона сурат гирад.
Дар ҳолати сари вақт гузаронидани коркарди кимиёвӣ дар мавзеъҳои мушоҳидагашта метавон аз ин офати сангин раҳоӣ ёфт.