Ошкоргардии воридоти доруҳои қалбакӣ

Душанбе, 16.03.2016 (АМИТ «Ховар»).- Хадамоти гумруки назди Ҳукумати Ҷумҳурии Тоҷикистон дар давраи соли 2015 ва 2- моҳи соли 2016 беш аз 55 ҳазор доруҳои қалбакӣ ва пастсифатро нобуд сохта, дар маҷмӯъ 11 ҳолати воридоти ғайриқонунии дорувориро ба қайд гирифт. Масъулини Хадамоти гумрук дар вилояти Суғд воридоти ғайриқонунии доруворӣ ба миқдори умумии 52 ҳазору 744 дона ва 1 ҳазору 425 қуттӣ дорувории бе сифати муҳлати истифодаашон гузаштаро ошкор намуданд. Ҳамчунин доруи Амоксатсиклин, Апетамол ва Ру-фен, ки ҳуҷҷатҳои тасдиқкунанда надоштанд ва доруҳое, ки ғайри қобили истеъмоланд, ба қайд гирифта шудаанд.
Оид ба ин амали ғайриқонунӣ аз ҷониби кормандони Хадамоти гумрук дар вилояти Суғд 10 парвандаи ҳуқуквайронкунии маъмурӣ ва 1 парвандаи ҷиноятӣ тартиб дода шуда, ба мақомоти суд ва прокуратура барои баррасӣ ирсол шуданд.