Шиносоии афсарон бо воситаҳои муҳофизатӣ ва асбобҳои иктишофии муосир

Душанбе, 16.03.2015. (АМИТ «Ховар»). — Бо мақсади сайқал додани донишу малакаи касбии афсарони сохторҳои таркибии Кумитаи ҳолатҳои фавқулода ва мудофиаи граждании назди ҲҶТ дар Маркази таълимию методӣ курсҳои омўзишӣ ба роҳ монда шуданд.
Тавре ки котиби матбуотии кумита Ориф Нозимов иттилоъ дод, курси «Авалин амалиёти ҷавобӣ бар зидди истифодаи силоҳи кимиёвӣ, биологӣ, радиологӣ ва ядроӣ» бо дастгирӣ ва ташаббуси Сафорати ИМА дарТоҷикистон ташкил гардида, дар он мутахассисони хориҷӣ мувофиқ ба талаботи ҷаҳони муосир ҳозиринро ба омўзиш фаро мегиранд.
Дар рўзи кушодашавии курсҳо муовини раиси Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон полковник М.Салимзода ва мутахассиси бехатарии минтақавии сафорати ИМА дар Тоҷикистон Тим Болс сухан намуданд.
Бояд зикр кард, ки омўзиш дар курси мазкур аз тариқи назариявию амалӣ сурат гирифта, дар давоми курс мутахассисон бо воситаҳои муҳофизатӣ ва асбобҳои иктишофи ҳозиразамон шинос шуда, ба тариқи амалӣ фаъолият кардани он омўзонида мешавад.
«Бояд гуфт, ки дар Маркази таълимию методии кумита пайваста курсҳои омӯзишӣ ба роҳ монда мешаванд ва ҳар дафъа зимни баргузории курсҳо унсурҳои нави омўзишӣ, ки ба талаботи ҷаҳонӣ ҷавобгӯянд, омӯзонида мешаванд»,-илова намуд О.Нозимов.
Дар марказ табақаҳои гуногуни аҳолӣ ба омўзиш фаро гирифта мешаванд. Дар ояндаи наздик дар заминаи ҳамкории байналмилалии кумита, барои васли техникаву таҷҳизоти муосири таълимӣ ва дар ин замина навсозӣ ва мукаммалгардонии маркази мазкур пешбинӣ гардидааст.