Суҳбати телефонии Эмомалӣ Раҳмон бо Муҳаммад Ашраф Ғанӣ

Душанбе, 20.03.2016. (АМИТ “Ховар”). — Дар нимаи дуюми рӯзи 20 марти соли равон бо ташаббуси ҷониби Афғонистон суҳбати телефонии  Президенти Ҷумҳурии Тоҷикистон Эмомалӣ Раҳмон бо Раисҷумҳури  Ҷумҳурии Исломии Афғонистон Муҳаммад Ашраф Ғанӣ баргузор гардид.

Дар рафти суҳбат сарони ду давлати ба ҳам дӯсту ҳамсоя ҳамдигар ва мардумони кишварҳояшонро ба муносибати фарорасии ҷашни байналмилалии Наврӯзи хуҷастапай табрику муборакбод намуданд.

Ҳангоми суҳбат ҷонибҳо ҳолати имрӯзаву дурнамои робитаҳои гуногунҷанбаи байни Тоҷикистон ва Афғонистон, ҳамчунин масоили мубрами минтақавию байналмилалиро низ мавриди баррасӣ қарор доданд.

Дар робита ба ин, Пешвои миллат Эмомалӣ Раҳмон аз ҳамтои худ доктор Муҳаммад Ашраф Ғанӣ ҷиҳати анҷом додани боздиди расмӣ аз Тоҷикистон ва иштирок дар маросими ифтитоҳи корҳои сохтмонӣ  дар тарҳи дорои аҳамияти бузурги минтақавӣ – КАСА-1000  даъват ба амал овард. Раисҷумҳури Афғонистон ин даъватро бо хушӣ пазируфт.