Таҷлили ҷашни Наврӯз дар Олмон

Душанбе, 25.03.2016 (АМИТ «Ховар»).- Бо ташаббуси сафоратхонаҳои кишварҳои ҳавзаи Наврӯз ва мусоидати шаҳрдории шаҳри Берлини Олмон ҷашни байналмилалии Наврӯз 2016 бо иштироки кишварҳои Тоҷикистон, Афғонистон, Эрон, Покистон, Туркия, Узбекистон, Қирғизистон, Қазоқистон, Туркманистон ва Озарбойҷон бо шукӯҳи хосса дар толори бузурги Осорхонаи этнологии шаҳри Берлин баргузор гардид.
Тантанаҳои ҷашни наврӯзиро иштирокдорони ин ҳамоиш аз тамошои гӯшаҳои фарҳангӣ оғоз намуданд. Сафорати Тоҷикистон дар Олмон гӯшаи фарҳангӣ иборат аз маводи бозгӯйи фарҳанги миллӣ созмон дода, маводи таблиғотӣ оид ба таъриху фарҳанги куҳани ниёгонамонро ба ҳозирин пешниҳод намуд.
Бо ташаббуси Сафорат Наврӯзнома бо забони олмонӣ таҳия гардида, ба кулли ҳозирин тақдим гардид, ки дар он таърихи пайдоиши Наврӯз ва унсуру рукнҳои ин ҷашни қадимӣ шарҳ дода мешавад. Ҷашни наврӯзиро намояндаи шаҳрдории Берлин ифтитоҳ бахшида, сипас гурӯҳҳои ҳунарӣ ва сарояндаҳои шинохтаи кишварҳои иштирокдор ба ҳозирин барномаҳои идонаи ҳунариро бо завқи баланд пешниҳод намуданд.
Дар фурсати танаффус барои меҳмонон мизҳои хӯрокҳои миллии кишварҳо пешниҳод шуданд. Ба базмгоҳи наврӯзӣ шаҳрвандони шаҳри Берлин, инчунин Сафорати Тоҷикистон дар кишвари иқомат аъзои ҷамъияти дӯстии Тоҷикистону Олмон, ҳунармандон, олимон ва ҳамватанонамон, ки дар Олмон зиндагию кор ва таҳсил мекунанд, даъват шуда буданд.
Сафири Тоҷикистон дар Олмон Маликшо Неъматов бо ҳамватанонамон суҳбат намуда, онҳоро бо ҷашни фархундаи Наврӯз табрик гуфт.