Талаби пора аз модари даъватшаванда

Душанбе,15.03.2016. (АМИТ «Ховар»).- 13 марти соли равон дар натиҷаи гузаронидани чорабиниҳои фаврӣ-ҷустуҷӯӣ яке аз кормандони Комиссариати ҳарбии ноҳияи Ҷ.Расулов, сокини 35-солаи ҳамин ноҳия бо гумони талаб намудани пора аз ҷониби кормандони милитсия дастгир гардид.
Гумонбаршуда барои надодани даъватнома дар доираи даъват ва минбаъд аз даъват ба хизмати ҳарбӣ озод намудани даъватшаванда, сокини 22-солаи ноҳияи мазкур, ки ҳоло дар муҳоҷирати меҳнатӣ дар Федератсияи Русия қарор дорад, тавассути посбони комиссариат, сокини 35-солаи ноҳия, аз модари даъватшаванда, сокини 50-солаи ноҳияи Ҷ.Расулов 3 ҳазор сомониро ҳамчун пора талаб карда гирифтааст. Далели шайъӣ гирифта шуд.
Нисбат ба далели мазкур парвандаи ҷиноятӣ оғоз гардида, тафтиш идома дорад.