Вохӯрии сармуҳаррири «Адабиёт ва санъат» бо журналистони оянда

Душанбе, 09.03.2016, (АМИТ «Ховар»).- Имрӯз бо ташаббуси кафедраи матбуоти Донишгоҳи миллии Тоҷикистон барои ҳавасманд гардонидани рӯзноманигорони оянда вохӯрии сармуҳаррири ҳафтаномаи «Адабиёт ва санъат» Мансур Сайфиддин ва нависанда Бахтиёри Муртазо доир гардид.
Чорабиниро декани факултети журналистика Саъдӣ Исматов оғоз карда, ташкили чунин вохӯриҳоро барои донишҷӯён манфиатбахш арзёбӣ намуд.
Муаллими калони кафедраи матбуот Қироншоҳ Шарифзода меҳмононро ба донишҷӯён муаррифӣ намуда, онҳоро бо эҷодиёти Мансур Сайфиддин (Мансур Суруш) ошно намуд.
Сармуҳаррири минбари эҷодкорони Тоҷикистон «Адабиёт ва санъат» ҳозиринро бо Рӯзи матбуоти тоҷик табрик намуда, гуфт: «Воқеан имрӯз озодии сухан дар Тоҷикистон баръало мушоҳида мешавад. Далели ин гуфтаҳо он аст, ки дар кишвари мо зиёда аз 500 рӯзномаи давлатию хусусӣ фаъолият мекунад».