Академияи илмҳо: 265 кори илмӣ дар се моҳ

Душанбе, 12.04.2016 /АМИТ «Ховар»/. «Давлат ва ҳукумат илмро ҳамчун омили пешбарандаи ҷамъият арзёбӣ намуда, барои рушди минбаъдаи он ва беҳтар кардани шароити иҷтимоиву иқтисодии олимон тадбирҳои судманд меандешад»,- иброз дошт президенти Академияи илмҳои Ҷумҳурии Тоҷикистон Фарҳод Раҳимӣ имрӯз зимни таҷлили иди касбии олимон- Рӯзи илм.
Ба гуфтаи Фарҳод Раҳимӣ, олимони Академияи илмҳои Ҷумҳурии Тоҷикистон дар чанд соли охир корҳои илмӣ- тадқиқотии худро аз рӯи 60 мавзӯи бунёдӣ ва 45 мавзӯи амалӣ идома дода, дар соҳаҳои мухталифи илм натиҷаҳои назаррас ба даст оварданд.
Дар се моҳи аввали соли равон аз ҷониби кормандони муассисаҳои илмии Академияи илмҳои Ҷумҳурии Тоҷикистон 265 кори илмӣ, аз ҷумла 23 китобу монография ва 242 мақолаи илмӣ дар маҷаллаҳои илмии ҷумҳурӣ ва кишварҳои Иттиҳоди давлатҳои мустақил ба табъ расонида шудаанд.