«Бисту панҷ баҳори гулафшон» — озмуни эҷодӣ дар Қурғонтеппа

Душанбе, 26.04.2016./АМИТ«Ховар»/. Мақомоти иҷроияи ҳокимияти давлатии шаҳри Қурғонтеппа, Кумитаи иҷроияи ҲХДТ дар шаҳри мазкур, ҳайати эҷодии рӯзномаи «Набзи Қурғонтеппа» ва  Шӯрои шаҳрии Ҳаракати ваҳдати миллӣ ва эҳёи Тоҷикистон бахшида ба 25-солагии Истиқлолияти давлатии Ҷумҳурии Тоҷикистон дар байни шоирон, нависандагон, журналистон, омӯзгорон ва дигар эҷодкорон таҳти унвони  «Бисту панҷ баҳори гулафшон» озмуни эҷодӣ  эълон намудааст. Озмун  аз  рӯи чор жанр: шеър, ҳикоя, мақола ва очерк сурат гирифта,  дар ҳар жанр 3 ҷойи ифтихорӣ бо мукофоти пулӣ муайян гардидааст. Озмун дар арафаи ҷашни 25-солагии Истиқлолияти давлатӣ  ҷамъбаст мегардад.
Дар ин бора аз Маркази матбуоти мақомоти иҷроияи ҳокимияти давлатии шаҳри Қурғонтеппа хабар дода, ҳамчунин зикр намуданд, ки маводҳои ба озмун пешниҳодшуда бояд дастовардҳои даврони соҳибистиқлолии Тоҷикистон ва нақши фарзонаи фарзандони миллатро дар таҳкими он  пурра инъикос намуда,  бо тасвирҳои зебо ва хулосаҳои ҳидояткунанда  дар ниҳоди ҳар тоҷикистонӣ  дӯст доштани ин сарзаминро  талқин созанд.