Бонувони собиқадори Кӯлоб ба ҷавонон дарси оиладорӣ меомӯзанд

Душанбе, 29.04.2016./АМИТ«Ховар»/. Кормандони шуъбаи кор бо занон ва оилаи мақомоти иҷроияи ҳокимияти давлатии шаҳри Кӯлоб дар якҷоягӣ  бо намояндагони мақомоти иҷроияи ҳокимияти давлатии вилояти Хатлон  бо бонувони собиқадор ва фаъоли  шаҳр  мулоқот барпо намуданд.
Дар ҷамъомад масъалаҳои мубрами рӯз, аз қабили  маърифатнокии занону духтарон, ба шуғл пайвастани онҳо, таълиму тарбияи насли наврас, ба ҳизбу ҳаракатҳои тундрав напайвастани ҷавонон, танзими расму оинҳои миллӣ, эҳтирому арҷгузорӣ ба либоси миллӣ, пешгирии  тақлид ба либосҳои бегона, пешгирии зӯроварӣ дар оила, худкушию худсӯзии занон, ҷинояткорӣ ва дигар омилҳои номатлуби ҷомеа    мавриди баррасӣ қарор доштанд.
Байни иштирокдорони мулоқот оид ба сабаб ва  пайдоиш   омилҳои номатлуб ва дарёфти роҳҳои  ҳалли он мубодилаи афкор ба миён омад ва  чанд нафар аз занони собиқадор аз таҷрибаи рӯзгорашон сухан ронда, сабаби асосии ба ин мушкилӣ дучор омадани  оилаҳоро дар бемаърифатӣ ва бешуғл мондани  бархе аз занону модарон донистанд.
Кормандони шуъбаи кор бо занон ва оилаи мақомоти иҷроияи ҳокимияти давлатии шаҳри Кӯлоб ва  намояндагони мақомоти иҷроияи ҳокимияти давлатии вилояти Хатлон оид ба тадбирҳои судманди давлату Ҳукумат дар  самти маърифатнокии занон  маълумот дода, аз занони собиқадор даъват ба амал оварданд, ки нисбат ба  мушкилоти мавҷуда бетарафӣ зоҳир насозанд  ва   дар ҳамкорӣ бо мақомоти давлатӣ   ба занону духтарони ҷавон аз таҷрибаи андӯхтаашон дарси оиладорӣ   омӯзанд.