«Файзи Истиқлол» — интихоб ва дарёфти асарҳои арзандаи драмавӣ

Душанбе, 25.04.2016 /АМИТ «Ховар»/. Вазорати фарҳанги Ҷумҳурии Тоҷикистон  бахшида ба 25 — солагии Истиқлолияти давлатии Ҷумҳурии Тоҷикистон Фестивал-озмуни ҷумҳуриявии театрҳои халқӣ «Файзи Истиқлол»-ро роҳандозӣ менамояд. Фестивал-озмун дар ду давр — моҳи май ва  июни соли равон  дар маркази вилоятҳо ва шаҳру ноҳияҳои тобеи ҷумҳурӣ баргузор гардида,   даври дуюми он аввали моҳи июли соли 2016 дар Театри давлатии ҷавонон ба номи М. Воҳидов ҷамъбаст мегардад.
Раёсат, шуъба ва бахшҳои фарҳанги мақомоти иҷроияи ҳокимияти давлатии вилоятҳо ва шаҳру ноҳияҳои тобеи ҷумҳурӣ бо салоҳдиди хеш барои ғолибони Фестивал-озмун мукофот таъсис дода, ҳамзамон Вазорати фарҳанги Ҷумҳурии Тоҷикистон ғолибони даври ҷамъбастиро бо  мукофоти пуливу туҳфаҳои хотиравӣ ва гурӯҳи  фаъоли онҳоро бо нишони «Аълочии фарҳанги Ҷумҳурии Тоҷикистон» ва ифтихорномаҳо сарфароз мегардонад.
Дар ин  бора  Ғуломзода Қурбон, сардори Раёсати рушди муассисаҳои фарҳангӣ-фароғатӣ ва ҳунарҳои мардумии Вазорати фарҳанги ҷумҳурӣ иттилоъ дода, зикр намуд, ки дар ҷамъбасти  Фестивал-озмун аз вилоятҳои Хатлон  ду  (минтақаҳои Кӯлоб ва Қурғонтеппа),  Суғду ВМКБ ва аз водиҳои Ҳисору Рашт яктогӣ театрҳои халқӣ пешниҳод мегарданд.
— Мақсад аз баргузории Фестивал-озмуни ҷумҳуриявии театрҳои халқӣ- «Файзи Истиқлол» рӯи саҳна овардани асарҳои драмавии шоиставу арзандаи замони истиқлол ва  тарғиби ҳамаҷонибаи ғояҳои Ваҳдати миллӣ, дӯстию бародарӣ, ватанпарварӣ, тарбияи насли наврас, инчунин дастовардҳои замони истиқлол мебошад, -гуфт дар идомаи суҳбат Ғуломзода Қурбон.