Фестивали дўстии ҷавонон дар Бадахшон оғоз шуд

Хоруғ, 19.04.2016. /АМИТ «Ховар»/. Фестивали дӯстии ҷавонон зери шиори «Ваҳдати ҷавонон-ояндаи шукуфои Тоҷикистон» аз ноҳияи Дарвоз оғоз ёфт. Корманди масъули Раёсати ҷавонон, варзиш ва сайёҳии вилоят Сураҷ Чоршанбиев гуфт, ки дар фестивал наздики 100 нафар ҷавонон аз манотиқи мухталифи кишвар бо шумули донишҷўён, омӯзгорону олимони ҷавон, ҳунармандон ва дастаи захиравии тими «Истиқлол» ширкат меварзанд. Иштирокдорони фестивалро дар назди дарвозаи ноҳия бо рақсу тарона истиқбол гирифтанд ва баъдан базми ҷавонӣ дар майдончаи марказ, дар зери чанори 500- сола идома ёфт. Ҷавонон бо ҳам суҳбату мулоқот ва барномаи ҳунарӣ баргузор намуданд. Ҳадафи фестивал дидору гуфтугўи рў ба рў, аз наздик шинос шудан бо зиндагию рўзгори ҳамдигар, таҳияи нақшаи ояндаи фаъолият дар самтҳои мухталиф мебошад. Дар доираи он ҷавонон ба сайри мавзеъҳои таърихӣ ва ҷолиби шаҳру вилоят сафар мекунанд.
Сураҷ Чоршанбиев гуфт, ки 20 апрел дар майдони Исмоили Сомонӣ барномаи муҳташами адабӣ-мусиқӣ баргузор мегардад. Дар варзишгоҳи марказӣ вохӯрии дӯстона аз намуди футбол миёни тимҳои мунтахаби «ВМКБ» ва «Истиқлол» дар назар аст.
Ёдовар мешавем, ки ҷашни ҷумҳуриявии Ваҳдати миллӣ соли равон дар маркази вилоят- шаҳри Хоруғ баргузор мегардад.