“Истиқлол” ба дарвозаи “Парвоз” 4 голи беҷавоб зад

Душанбе, 8.04.2016 /АМИТ «Ховар»/. Аввалин голи мавсими футболи соли 2016-ро ҳамлагар не, балки муҳофизатгари “Истиқлол”-и Душанбе Сиёвуш Асроров бо зарбаи сар ба нишон расонд. Ин ҳолат дар дақиқаи 29-уми қисми аввал ба амал омад.
Дар бозии ифтитоҳии даври аввали Чемпионати Тоҷикистон чемпиони чоркаратаи мамлакат “Истиқлол” ба дарвозаи рақиби худ- “Парвоз” -и ноҳияи Бобоҷон Ғафуров 4 голи беҷавоб зад.
Фатҳулло Фатҳуллоев, ки дар нимаи аввал ба ҷои ҳамлагари латбардоштаи соҳибони майдон Александр Каблаш ба майдон омад, бо ду голи задааш дар протоколи бозӣ сабти ном кард. Боз як тӯби дигари “Истиқлол”-ро Манучеҳр Ҷалилов ба дарвоза зад.
Бозиҳои дигари даври аввал 9-10 апрел баргузор мешаванд. Рӯзи шанбе “Регар-ТадАЗ” бо КМВА “Помир”, “Хуҷанд” бо “Вахш” ва рӯзи якшанбе “Хайр” бо “Равшан” ва “Ҳосилот” бо “Барқчӣ” рақобат мекунанд.