“Истиқлол” ва “Хуҷанд”- пешсафони Лигаи олӣ

Душанбе, 25.04.2016 /АМИТ «Ховар»/. Баъди анҷоми даври сеюми мусобиқоти Лигаи олии чемпионати мамлакат дастаҳои “Истиқлол” ва “Хуҷанд” бо 9 имтиёз дар ҷойҳои аввали ҷадвал қарор доранд.
Дар бозии дербии вилояти Суғд дирӯз ду дастаи ин вилоят- “Хуҷанд”-и Хуҷанд ва “Парвоз”-и ноҳияи Бобоҷон Ғафуров бо ҳам вохӯрданд.
Дар қисми дуввум ба ҳамлагари хуҷандиҳо Фарҳод Тоҳиров муяссар гардид, ки дар дақиқаи 70-ум тӯби ягонаро ба дарвозаи меҳмонон зада, «Хуҷанд»-ро  дар севумин бозиаш дар мавсими соли 2016 ба ғалаба комёб гардонад.
“Вахш”-и Қурғонтеппа дар бозии сафарии худ қариб буд “Ҳосилот”-и Фархорро дар назди мухлисони сершумораш ба мағлубият рӯ ба рӯ кунад, аммо соҳибони майдон бо кӯшиши зиёд ноқисии ду голро дар қисми аввал барҳам зада, дар нимаи дуввум бо ҳисоби 3:2 ба пирӯзӣ сазовор шуданд. Ин аввалин имтиёз дар “кӯшиш барои ғалаба”-и “Ҳосилот” аст.
Дар варзишгоҳи марказӣ дастаи “Барқчӣ” бар “Равшан”-и Кӯлоб бо натиҷаи 2:0 зафар ёфт.
“Хайр”-и Ваҳдат ва КМВА “Помир” бозиашонро мусовӣ 0:0 ҷамъбаст карданд.
Дар байни нишонзанҳои беҳтарин Манучеҳр Ҷалилов бо 4 гол пешсаф мебошад.