Мулоқот бо намояндагони Франсия дар Вазорати нақлиёти ҶТ

Душанбе, 28.04.2016. /АМИТ «Ховар»/. 25 апрели соли равон вазири нақлиёти Ҷумҳурии Тоҷикистон Ганҷалзода Шералӣ Раҳмон  ҳайати  Сарраёсати авиатсияи  граждании Ҷумҳурии Франсия: Франк Жиро- сардори Раёсати ҳамкории байналмилалӣ бо кишварҳои Осиёи Марказии Ҷумҳурии Франсия, хонум Корин Луве- масъули рушди ҳамкорӣ бо кишварҳои Осиёи Марказӣ дар Донишкадаи миллии авиатсияи гражданӣ ва дигар намояндагонро бо сарварии Сафири Фавқулодда ва Мухтори ҶумҳурииФрансия дар Тоҷикистон Дидйе Леруа барои мулоқот ба ҳузур пазируфт.
Зимни мулоқот масоили  бастани Созишномаи ҳамкорӣ дар соҳаи авиатсияи гражданӣ, кушодани хатсайрҳо миёни Душанбе ва Париж ва дигар масоили мубрами рӯз мавриди баррасӣ қарор гирифтанд. Дар вохӯрӣ нахуст аз ҳамкории дуҷониба  байни ин ду кишвар сухан рафта, гуфта шуд, ки миёни Ҳукумати Ҷумҳурии Тоҷикистон ва Ҳукумати Ҷумҳурии Франсия тӯли солҳои охир ҳамкории судманд амалӣ гаштаанд, ки ба истифода додани терминали мусофирбарӣ дар «Фурудгоҳи байналмилалии Душанбе» аз ҷониби  Ҷумҳурии Франсия   далели равшани гуфтаҳои болост.