Ҳам “Нафт Алвасат” ва ҳам “Истиқлол” танҳо барои ғалаба ба майдон меоянд
![](https://khovar.tj/wp-content/uploads/2016/04/Pres_konfrons_Naft_al_vasat_Isitslol.jpg)
Душанбе, 11.04.2016 (АМИТ «Ховар»).- Имрӯз дар меҳмонхонаи “Hyatt regency” бо ширкати мураббиён ва бозингарони дастаҳои “Нафт Алвасат” ва “Истиқлол”-и Душанбе, ки дар бозии чоруми Ҷоми Конфедератсияи футболи Осиё дар гурӯҳи “Б” пагоҳ соати 19 дар Варзишгоҳи марказии шаҳри Душанбе ба майдон меоянд, нишасти хабарӣ баргузор гардид.
Аз ҷониби меҳмонон ба ҷои сармураббии даста Соир Аҳмад, ки бинобар сабаби надоштани Литсензияи “А” аз ҷониби КФО ҳамчун сармураббӣ ҳаққи иштирок дар мусобиқоти сатҳи Осиёиро аз даст додааст, ёвараш Фаллоҳ Ҳасан ба саволҳои хабарнигорон ҷавоб гуфта, арз кард, ки “Нафт Алвасат” барои нигоҳ доштани мавқеаш дар садри ҷадвали гурӯҳи “Б” танҳо бо мақсади ғалаба ба майдон меояд. Ӯ гуфт: “Ба ғайр аз ду- се бозингари осебдида дигар ҳама ба Тоҷикистон омадаанд ва рӯҳияи бозингарон болида аст, то аз Тоҷикистон бо се имтиёз баргарданд”.
Сармураббии дастаи “Истиқлол”Мубин Эргашев ва бозингари даста Парвиз Умарбоев низ зикр карданд, ки танҳо ғалаба бар “Нафт Алвасат” имкон медиҳад дастаи “Истиқлол”муборизаро барои ба даври дигар гузаштан идома диҳад, агар не, пас ду бозии боқимонда беарзиш хоҳанд буд. Онҳо аз мухлисон даъват карданд, ки ба варзишгоҳ омада, футболбозонро рӯҳбаланд ва дастгирӣ кунанд.
Ёдрас мешавем, ки бозии аввали ин дастаҳо бо ғалабаи “Нафт Алвасат” бо натиҷаи 2 бар 0 дар шаҳри Поси Эрон хотима ёфта буд.