Низоми кредитии таҳсилот: ҳолат, муаммоҳо ва роҳҳои инкишоф

Хуҷанд, 13.04.2016. (АМИТ «Ховар»). «Воридшавии Ҷумҳурии Тоҷикистон ба низоми кредитии таҳсилот: ҳолат, муаммоҳо ва роҳҳои инкишоф»-чунин унвон дорад конфронси илмию методии ҷумҳуриявӣ, ки 22 апрели соли равон дар Донишгоҳи давлатии ҳуқуқ, бизнес ва сиёсати Тоҷикистон (ДДҲБСТ) дар шаҳри Хуҷанд баргузор хоҳад шуд.
Бино ба иттилои масъулини бахши таълим ва илми донишгоҳ, дар кори конфронс олимону мутахассисони соҳа, устодони муассисаҳои таҳсилоти олии касбии мамлакат ширкат варзида, масоили таҷрибаи муассисаҳои таҳсилоти олии кишварро дар ҷорӣ намудани низоми кредитии таҳсилот, усулҳои таълим, таҷрибаомўзӣ ва роҳҳои такмили он дар низоми мазкур, таҳсилоти ғоибона ва ҷорӣ намудани низоми фосилавӣ дар муассисаҳои таҳсилоти олии касбӣ, самтҳо ва мавзўъҳои меҳварии ҳамоишро баррасӣ мекунанд.
Аз рўи маводи пешниҳодшуда ба нашр расонидани маҷмўаи мақолаҳои илмӣ дар назар аст.
Дар ин бора сардори шуъбаи таҳлил ва робита бо ҷомеаи ДДҲБСТ, дотсент Шавкат Рустамов иттилоъ дод.