Қочоқбарони маводи мухаддир равонаи маҳбас шуданд

Хоруғ, 12.04.2016. /АМИТ «Ховар»/. Ба хотири пешгирии қочоқ ва интиқоли маводи мухаддир аз ҷониби кормандони Раёсати Кумитаи давлатии амнияти миллии ҶТ дар ВМКБ бо дастгирии сокинони деҳаҳои наздимарзии вилоят чорабинии фаврӣ-ҷустуҷӯӣ анҷом дода шуд, ки натиҷаи он ба фаъолияти боз як гурӯҳи муташаккили фаромиллии қочоқчиён хотима гузошт. Ин амалиёт дар ҳудуди деҳаи Чошкандези ҷамоати деҳоти Мирзоҷон Ширинҷонови ноҳияи Шуғнон роҳандозӣ шуд. Аъзои фаъоли гурӯҳи фаромиллии нашъаҷаллоб Гулбердиев Атомамад Султонбердиевич ва Абдулхолиқов Хусрав Некқадамович зода ва истиқоматкунандаи деҳаи Сохчарви ноҳияи Шуғнон ҳангоми муомилоти маводи мухаддир дар наздикии марз боздошт гардиданд. Нафарони мазкур дар алоқа бо Мадулло ном шаҳрванди Ҷумҳурии Исломии Афғонистон, яке аз қочоқчиёни ашаддӣ ва узви гурӯҳи фаромиллии нашъаҷаллоб аз самти ҷумҳурии ҳамсоя бо вайрон намудани сарҳади давлатӣ мехостанд, ки маводи мухаддирро ба миқдори 1 кг 80 грамм ба ин сӯи рӯдхонаи Панҷ интиқол диҳанд, аммо аз ҷониби кормандони амниятӣ дар ҷои ҳодиса дастгир шуданд.
Аз рӯи далели мазкур аз ҷониби Шуъбаи тафтишоти Раёсати Кумитаи давлатии амнияти миллӣ дар ВМКБ парвандаҳои ҷиноӣ оғоз ва баъди ба охир расидани тафтишоти пешакӣ ба суд ирсол карда шуданд.
Ҳамин тариқ, суди ноҳияи Шуғнони ВМКБ кирдорҳои зишту нангини онҳоро ҳамаҷониба тахқиқ намуда, тибқи талаботи моддаҳои 200, 289-и Кодекси ҷиноятии ҶТ Гулбердиев Атомамад Султонбердиевич ба муҳлати 8 солу 6 моҳ ва Абдулхолиқов Хусрав Некқадамович ба муҳлати 8 сол аз озодӣ маҳрум гардиданд.