Ҷоми ҷаҳон- 2018: Дастаҳои мунтахаби муваффақи Осиё ҳарифонашонро шинохтанд

Душанбе, 12.04.2016 (АМИТ «Ховар»). Дар натиҷаи қуръакашии даври охири бозиҳои Ҷоми ҷаҳон 2018, ки финали он дар кишвари Русия баргузор мешавад, дар қитъаи Осиё дастаҳои мунтахаби муваффақ дар ду гурӯҳ ҳарифони худро муайян карданд.
Тибқи қуръакашие, ки дар қароргоҳи Конфедератсияи футболи Осиё- шаҳри Куала-Лумпури Малайзия баргузор шуд, дар гурӯҳи “А” дастаҳои мунтахаби Эрон, Кореяи Ҷанубӣ, Узбекистон, Чин, Қатар ва Сурия, дар гурӯҳи “В” тимҳои мунтахаби Австралия, Ҷопон, Арабистони Саудӣ, Амороти Мутаҳидаи Араб, Ироқ ва Таиланд бо ҳам омаданд.
Вохӯриҳо аз 1 сентябри соли 2016 оғоз гардида, то 5 сентябри соли 2017 идома меёбанд.
Тибқи низомномаи мусобиқа ғолибон ва барандагони мақомҳои дуввуми гурӯҳҳо мустақиман ба бозиҳои ниҳоии Ҷоми ҷаҳон роҳхат мегиранд. Соҳибони ҷойҳои сеюми гурӯҳҳо барои роҳ пайдо кардан ба бозиҳои ниҳоии Ҷоми ҷаҳон бо ҳам қувва меозмоянд.
Ғолиби ин ҷуфти бозиҳо бо соҳиби мақоми 5-уми CONCACAF барои ноил шудан ба як роҳхати дигар муборизаро идома медиҳад.