Таъмини ҷузъу томҳои Қувваҳои Мусаллаҳ — дар мадди аввал

Душанбе, 14.04.2016. /АМИТ «Ховар»/. Роҳҳои сари вақт расонидани маҳсулоти хӯрокворӣ ва дигар амволи зарурӣ барои хизматчиёни ҳарбӣ вобаста ба таъминоти ҷузъу томҳо зимни ҷаласа дар Агентии таъминоти амволи махсуси назди Ҳукумати Ҷумҳурии Тоҷикистон баррасӣ шуд. Дар он инчунин масоили вобаста ба таъмини сохторҳои қудратии мамлакат бо маводи хӯрокворӣ, сару либоси низомӣ, пойафзолу дигар амволи шайъӣ таҳлил гардид.
Масъалаҳои таъмини ҷузъу томҳои Қувваҳои Мусаллаҳи мамлакат бо маводи хӯрокворӣ, сару либоси низомӣ, пойафзол, таъминоти сӯзишвориву равғанҳои молиданӣ ва дигар амволи шайъӣ ҳамеша дар маркази таваҷҷуҳи роҳбарияти олии кишвар қарор дошта, барои татбиқи амалии он аз ҷониби масъулини Агентии таъминоти амволи махсус корҳои зиёде амалӣ карда мешаванд.
Дар ҷаласа нахуст дастуру супоришҳои Асогузори сулҳу Ваҳдати миллӣ, Пешвои миллат, Президенти Ҷумҳурии Тоџикистон муҳтарам Эмомалӣ Раҳмон бобати таъмини қисмҳои низомӣ, бахусус наваскарон бо тамоми шароити рӯзмарра баррасӣ гардида, барои амалӣ намудани он қарорҳои дахлдор қабул карда шуданд.
Бино ба иттилои хадамоти матбуоти Вазорати мудофиаи ҷумҳурӣ, барои таъмини ҷузъу томҳои Қувваҳои Мусаллаҳи мамлакат бо маҳсулоти хӯрокворӣ ва дигар амволи мавриди ниёзи аввал Агентӣ тамоми тадбирҳоро меандешад.