14 ҳазор сокини Исфара бо оби тозаи ошомиданӣ таъмин мегарданд
Душанбе, 19. 05.16./АМИТ «Ховар»/. Мувофиқи лоиҳаи «Таъминоти деҳот бо оби нӯшокӣ ва беҳдошти санитарии деҳот дар водии Фарғона, Тоҷикистон» сохтмони хатти оби тозаи нӯшокӣ дар деҳаи Чилгазӣ оғоз гардид.
Тавре ки ба АМИТ «Ховар» аз Хадамоти матбуоти мақомоти иҷроияи ҳокимияти давлатии вилояти Суғд хабар доданд, сохтмони хатти интиқоли мазкур аз тарафи ҶДММ «Муҳандис» кашида шуда, то охири сол ба сомон расонида мешавад.
Дар ин хусус моҳи июли соли 2015 аз тарафи мақомоти иҷроияи ҳокимияти давлатии шаҳри Исфара ва идораи обу корези шаҳр созишнома ба имзо расида буд. Корҳои лоиҳакашӣ, ҷустуҷӯӣ-геологӣ ба анҷом расонида шуда, то ин дам 55 000 метр қубурҳо бо таҷҳизоти ҳархела харидорӣ гардиданд.
Баъди анҷоми лоиҳа наздики 14 ҳазор аҳолии деҳаи Чилгазӣ бо оби тозаи ошомиданӣ таъмин мегарданд. Инчунин 5 муассисаи таълимӣ, 1 боғчаи бачагона, беморхонаи деҳа ва Маркази саломатӣ бо оби тоза таъмин хоҳанд шуд.